2027-ci il büdcə layihəsi: uşağın doğulmasına görə müavinət 600 manatdan 1500 manata qaldırılır

Azərbaycanda uşağın doğulmasına görə ödənilən birdəfəlik müavinətin məbləği 2027-ci ildə 600 manatdan 1500 manata qaldırılır. Bu, Milli Məclisin İqtisadi siyasət, sənaye və sahibkarlıq komitəsinin 4 noyabrda keçirilən iclasında müzakirəyə çıxarılan “Azərbaycan Respublikasının 2027-ci il dövlət büdcəsi haqqında” qanun layihəsində öz əksini tapıb.

Layihəyə əsasən, növbəti ildə uşağın doğulmasına görə ödəniləcək məbləğin 1500 manat olması nəzərdə tutulur. 2026-cı ildə bu məbləğ 600 manat olub. Bu isə 900 manat artım deməkdir.

Eyni layihədə 3 yaşınadək uşağı olan sığortaolunan analara ödənilən aylıq müavinətin də artırılması nəzərdə tutulur. Layihəyə əsasən, 3 yaşınadək uşağa qulluğa görə bir nəfərə düşən aylıq məbləğ 37 manat 58 qəpikdən 100 manata qaldırılır. Bu, 62 manat 42 qəpik artım deməkdir.

Hazırda uşağın doğulmasına görə müavinət Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondu tərəfindən hər bir uşağın doğulmasına görə birdəfəlik ödənilir. Müavinət ailəyə verilir və bir qayda olaraq uşağın anasına ödənilir; ana işləmədikdə və ya hər hansı səbəbdən olmadıqda müavinəti işləyən ata alır.

Müavinətin təyin olunması üçün uşağın doğulması vətəndaşlıq vəziyyəti aktlarının qeydiyyatı qaydasında qeydə alınmalıdır. Çoxdöllü doğuş zamanı müavinət hər uşaq üçün ayrıca ödənilir. Müavinət müraciət tələb olunmadan, hüquq yarandıqda elektron sistem vasitəsilə avtomatik təyin edilir.

2027-ci il dövlət büdcəsi haqqında qanun layihəsi Milli Məclisin komitələrində müzakirə olunur. Layihədəki məbləğlər parlamentdə qəbul edildikdən sonra qüvvəyə minəcək.