Rusiya Müdafiə Nazirliyi: gecə ərzində Rusiyanın regionları üzərində 709 Ukrayna PUA-sı vurulub

Rusiya Müdafiə Nazirliyi noyabrın 4-də bildirib ki, hava hücumundan müdafiə vasitələri gecə ərzində Rusiyanın müxtəlif regionları üzərində 709 Ukrayna pilotsuz uçuş aparatını vurub.

Ukrayna Hərbi Hava Qüvvələri isə bildirib ki, Rusiya həmin gecə Ukraynaya 310 zərbə dronu buraxıb, hava hücumundan müdafiə onlardan 272-sini zərərsizləşdirib. Ukrayna tərəfinin məlumatına görə, pilotsuz uçuş aparatlarının 19 məkana isabəti qeydə alınıb, 15 yerə isə qəlpələr düşüb.

Kiyev Şəhər Dövlət Administrasiyası səhər saatlarında paytaxtda su təchizatının qismən bərpa edildiyini bildirib. Açıqlamaya görə, mütəxəssislər suyu paytaxtın bütün rayonlarının sakinlərinə qaytarmaq üçün şəbəkədə təzyiqin artırılması üzərində işləyir, su təchizatı hələ olmayan rayonlarda saat 08:00-dan bulaqlar generatorlara qoşulacaq.

Noyabrın 2-dən 3-nə keçən gecə Moskva meri Sergey Sobyanin Moskvaya yaxınlaşan 187 pilotsuz uçuş aparatının zərərsizləşdirildiyini bildirmişdi. Yaroslavl qubernatoru isə neft emalı zavoduna 124 Ukrayna PUA-sının hücumunun dəf edildiyini, zavodun zədələndiyini açıqlamışdı.

Noyabrın 2-də Qazaxıstan Energetika Nazirliyi Rusiyanın Samara istehsal-dispetçer qovşağının obyektlərinə pilotsuz uçuş aparatlarının hücumundan sonra «Atırau–Samara» kəməri ilə neft nəqlinin müvəqqəti dayandırıldığını bildirmişdi.

Noyabrın 3-də Rusiyanın Ukraynanın enerji infrastrukturuna hücumundan sonra Jitomir şəhəri tamamilə elektriksiz qalmış, Kiyevdə enerji sistemindəki kritik vəziyyət səbəbindən tramvay və trolleybusların hərəkəti dayandırılmışdı. Ukraynanın energetika naziri Denis Şmıhal Rusiyanın Xmelnitski AES-in işi üçün kritik əhəmiyyətli yarımstansiyaya üç dron yönəltdiyini bildirmişdi.