Oman sahillərində neft tankeri iki naməlum mərmi ilə vurulub

Britaniya Dəniz Ticarəti Əməliyyatları Mərkəzi (UKMTO) noyabrın 3-ü axşam Omanın Lima şəhərindən 14 dəniz mili şimal-şərqdə baş vermiş hadisə barədə məlumat aldığını bildirib.

UKMTO-nun açıqlamasına görə, neft tankerlərindən birinin təhlükəsizlik məsulu gəminin iki naməlum mərmi ilə hədəfə alındığını bildirib. Mərmilər tankerin mühərrik bölməsinə dəyib.

Mərkəz qeyd edib ki, hadisə nəticəsində hələlik itki və ya ekoloji ziyan barədə məlumat yoxdur. Tankerin adı, bayrağı və yükü barədə məlumat açıqlanmayıb.

Hadisə Hörmüz boğazı ətrafında gərginliyin davam etdiyi bir vaxtda baş verib. Noyabrın 3-ü səhər İslam İnqilabı Keşikçiləri Korpusunun Hərbi Dəniz Qüvvələri Hörmüz boğazından qanunsuz şəkildə keçməyə cəhd edən üç neft tankerinin yandığını bildirmişdi. Həmin gün son 12 saat ərzində boğazdan cəmi 6 gəminin keçdiyi, onların əksəriyyətinin İranın müəyyən etdiyi dəhlizdən istifadə etdiyi bildirilib.

Avropa Komissiyasının sədri Ursula fon der Lyayen də noyabrın 3-ü Hörmüz boğazının bağlanmasının Avropaya əlavə 127 milyard avroya başa gəldiyini, bunun müqabilində Avropaya bircə zərrə də əlavə enerji çatmadığını bildirib.

Lima Omanın Hörmüz boğazı sahilində yerləşən Musəndəm mühafəzəsində kənddir. UKMTO Britaniya Kral Hərbi Dəniz Qüvvələrinə bağlı qurumdur və regionda ticarət gəmiçiliyinin təhlükəsizliyi ilə bağlı hadisələri izləyir.