Fon der Lyayen: Hörmüz boğazının bağlanması Avropaya əlavə 127 milyard avroya başa gəlib

Avropa Komissiyasının sədri Ursula fon der Lyayen noyabrın 3-də Hörmüz boğazının bağlanmasının Avropa üçün iqtisadi nəticələrinə toxunub.

Fon der Lyayenin sözlərinə görə, Hörmüz boğazının bağlanması Avropaya əlavə 127 milyard avroya başa gəlib və bunun müqabilində Avropaya bircə zərrə də əlavə enerji çatmayıb.

Avropa Komissiyasının sədri bu mövzuda əvvəllər də açıqlamalar verib. O, 2026-cı il aprelin 27-də Berlində keçirdiyi mətbuat konfransında Yaxın Şərqdəki müharibənin başlanmasından bəri Avropanın neft və qaz idxalı üçün əlavə 32 milyard dollar ödədiyini bildirmişdi. Fon der Lyayen o zaman deyib: “2022-ci ildə Putin qaz təchizatımızı kəsdi, indi isə Hörmüz boğazıdır. İdxal olunan qalıq yanacaqlardan ağır asılılığımız bizi həssas edir. Bu asılılığı azaltmalıyıq.”

Hörmüz boğazı İranla Oman arasında yerləşir və Fars körfəzini açıq dənizlə birləşdirir. Dünya neft ticarətinin təxminən beşdə biri bu boğazdan keçir.

Noyabrın 3-də İran Ali Milli Təhlükəsizlik Şurasının rəhbəri Möhsün Rzai Hörmüz boğazının yalnız İranın yeddi şərti yerinə yetirildikdən sonra açılacağını bildirib. Həmin gün İslam İnqilabı Keşikçiləri Korpusunun Hərbi Dəniz Qüvvələri boğazdan qanunsuz keçməyə cəhd edən üç neft tankerinin yandığını açıqlayıb. Avropa Komissiyası isə eyni gün vətəndaşlara böhran, təbii fəlakət və infrastruktur fasilələri zamanı ən azı 72 saat özünü təmin edə bilmək üçün tövsiyə xarakterli yeni təlimatlar təqdim edib.