Rusiyanın enerji infrastrukturuna hücumundan sonra Jitomir tamamilə elektriksiz qalıb

Ukraynanın Jitomir şəhərində elektrik enerjisi tamamilə kəsilib, vilayətin ayrı-ayrı rayonları da elektriksiz qalıb. Jitomir şəhər şurası bildirib ki, noyabrın 3-ü axşam Rusiya qoşunları enerji infrastrukturuna hücum edib.

Volın vilayətinin Kovel şəhərində də Rusiyanın infrastruktur obyektinə hücum etdiyini şəhər rəhbəri İqor Çayka bildirib. Onun sözlərinə görə, istehlakçıların əksəriyyəti elektrik enerjisi olmadan qalır, yerli su kanalı müəssisəsi isə ehtiyat enerji mənbələrinə keçir.

Həmin axşam Odessada da Rusiyanın hücumu nəticəsində ticarət infrastrukturuna ziyan dəyib. Odessa Şəhər Hərbi Administrasiyasının rəhbəri Serhiy Lısak bildirib ki, hücumun nəticələri barədə məlumat dəqiqləşdirilir.

Rusiya tərəfində isə Moskva meri Sergey Sobyanin bildirib ki, Moskvaya doğru uçan beş pilotsuz uçuş aparatı Rusiya Müdafiə Nazirliyinin hava hücumundan müdafiə sistemləri tərəfindən məhv edilib.

Hücumlar Ukraynanın enerji sisteminin gərgin vəziyyətdə olduğu bir vaxtda baş verib. Noyabrın 3-ü axşam Kiyevdə Rusiyanın zərbələri nəticəsində enerji sistemində yaranmış kritik vəziyyət səbəbindən tramvay və trolleybusların hərəkəti müvəqqəti dayandırılıb. Ukraynanın energetika naziri Denis Şmıhal isə Rusiyanın Xmelnitski Atom Elektrik Stansiyasının sabit işi üçün kritik əhəmiyyətli yarımstansiyaya üç dron yönəltdiyini bildirib.

Jitomir Kiyevin qərbində yerləşən vilayət mərkəzidir, Kovel isə Ukraynanın şimal-qərbində, Volın vilayətində mühüm dəmir yolu qovşağıdır. Rusiya ilə Ukrayna arasında 2022-ci ilin fevralında başlayan müharibə dövründə Ukraynanın enerji infrastrukturu dəfələrlə zərbələrə məruz qalıb.