Keşikçilər Korpusu: Hörmüz boğazının cənubunda dörd neft tankeri minalara toxunaraq məhv olub

İran İslam İnqilabı Keşikçiləri Korpusu noyabrın 4-də bildirib ki, Hörmüz boğazının cənubundakı qadağan olunmuş keçiddən keçməyə cəhd edən dörd neft tankeri dəniz minalarına toxunaraq məhv olub.

Korpusun bəyanatında tankerlər “qaydalara əməl etməyən” gəmilər kimi təsvir edilib və onların hələ də yandığı bildirilib. Bəyanata görə, qaydalara əməl etməyən daha iki gəmi saxlanılıb. Keşikçilər həmçinin boğaz üzərində bir pilotsuz uçuş aparatını vurduqlarını açıqlayıblar.

Tankerlərin adları, bayraqları, yükləri və ekipaj üzvləri arasında itki olub-olmaması barədə məlumat verilməyib. Keşikçilər Korpusunun açıqlaması hələlik müstəqil şəkildə təsdiqlənməyib.

Keşikçilər Korpusu oktyabr ayında da Hörmüz boğazında tankerlərin minalara toxunması barədə dəfələrlə — oktyabrın 12-si, 17-si, 19-u və 21-də — açıqlamalar yayıb. Noyabrın 3-də isə Korpusun Hərbi Dəniz Qüvvələri boğazdan qanunsuz keçməyə cəhd edən üç neft tankerinin yandığını bildirmişdi. ABŞ Mərkəzi Komandanlığı (CENTCOM) əvvəlki açıqlamalarda tankerlərin minalara toxunması barədə iddiaları rədd etmişdi.

İran Hörmüz boğazına nəzarət etdiyini bildirir və icazəsiz keçən gəmiləri hədəfə alır. Tehran boğazın yalnız Vaşinqtonun neft sanksiyalarını ləğv etməsi, İran limanlarına qarşı dəniz blokadasına son qoyması və dondurulmuş vəsaitləri azad etməsindən sonra açılacağını bəyan edib.

Beynəlxalq Dəniz Təşkilatının baş katibi Arsenio Dominqes bölgədə təxminən 6 min dənizçinin olduğunu, 350–400 gəminin isə orada qaldığını bildirib. Təşkilat oktyabr ayında gəmilərə qarşı 30-a yaxın hücum qeydə alıb. Fars körfəzini Oman körfəzi ilə birləşdirən Hörmüz boğazı dünya neft ticarətinin ən mühüm dəniz yollarından biridir.