Azərbaycan İranın 14 vətəndaşını “arzuolunmaz şəxs” elan edib, onların ölkəyə girişi qadağandır
Siyahıda İran parlamentinin deputatları, din xadimləri, siyasi ekspertlər və media nümayəndələri var. Qərar onların Azərbaycana qarşı çağırışları və düşmənçiliyi təşviq etməsi ilə əsaslandırılıb.
Azərbaycan İranın 14 vətəndaşını “arzuolunmaz şəxs” elan edərək onların ölkə ərazisinə girişini qadağan edib. Bu barədə məlumat noyabrın 3-də yayılıb.
Qərar həmin şəxslərin mediada və sosial şəbəkələrdə Azərbaycana qarşı çağırışlar səsləndirməsi və düşmənçiliyi təşviq etməsi ilə əsaslandırılıb. Siyahıda İran parlamentinin hazırkı və keçmiş deputatları, din xadimləri, siyasi ekspertlər və media nümayəndələri var.
Bildirilir ki, son vaxtlar İran vətəndaşlarının və media qurumlarının Azərbaycan dövlətinə, xalqına və ölkə rəhbərliyinə qarşı əsassız ittihamları, təhqiramiz ifadələri və qanunsuz çağırışları artıb. Məlumata görə, bəzi din xadimləri, parlament üzvləri, ekspertlər və media nümayəndələri Azərbaycanın suverenliyini, təhlükəsizliyini, dövlət-din münasibətlərini və idarəçilik sistemini hədəfə alıb, dini radikalizmi təbliğ edib, dini nifrət salmağa çalışıb və hakimiyyətin zorla dəyişdirilməsinə çağırıblar.
Siyahıya İran İslam Şurası Məclisinin deputatları Kamran Qəzənfəri, Əbülfəzl Zöhrəvənd, Abbas Müqtədai Xorasqani və Əlirza Səlimi, keçmiş deputat və siyasi şərhçi Əlirza Beygi, eləcə də “Keyhan” qəzetinin baş redaktoru Hüseyn Şəriətmədari daxildir.
Siyahıda həmçinin Ali Rəhbəri seçən Ekspertlər Məclisinin və Məsləhəti Müəyyənetmə Şurasının üzvü ayətullah Möhsün Əraki, Qum Elmi Hövzəsi Müəllimlər Cəmiyyətinin üzvü ayətullah Məhəmməd Cavad Fazil Lənkərani, Mədəni İnqilab Ali Şurasının katibi Əbdülhüseyn Xosrovpənah və Təbriz cümə imamı ofisinin ictimaiyyətlə əlaqələr rəhbəri Qulamrza Kavaşi var.
Digər şəxslər Tehrandakı Əllamə Təbatəbai Universitetinin müəllimi, siyasi analitik Ehsan Movahhediyan, Təbriz Universitetinin Qafqaz və Anadolu Araşdırmaları Mərkəzinin keçmiş rəhbəri Əhməd Fərşbafiyan, professor və siyasi ekspert Dariuş Səfərnejad, həmçinin aktyor və televiziya aparıcısı Əhmədrza Musəvidir.
Azərbaycan 2023-cü ilin aprelində də İranın Bakıdakı səfirliyinin dörd əməkdaşını “arzuolunmaz şəxs” elan edərək ölkədən çıxarmışdı. Həmin ilin yanvarında Azərbaycanın Tehrandakı səfirliyinə silahlı hücum edilmiş, səfirliyin təhlükəsizlik xidmətinin rəhbəri həlak olmuşdu.
