Azərbaycanda ərzaq qiymətləri kəskin bahalaşıb: yumurta, ət, kərə yağı, tərəvəz
Sentyabr-oktyabr aylarında bir sıra kənd təsərrüfatı məhsullarının qiymətləri əhəmiyyətli dərəcədə artıb. Oktyabrda kənd yumurtasının qiyməti 25 qəpikdən 45-50 qəpiyə yüksəlib.
Azərbaycanda bu ilin sentyabr-oktyabr aylarında bir sıra kənd təsərrüfatı məhsullarının, o cümlədən yumurta, ət və kərə yağının qiymətlərində əhəmiyyətli artım müşahidə olunur.
Oktyabr ayında kənd yumurtasının qiyməti 25 qəpikdən 45-50 qəpiyə yüksəlib, ilkin əldən satış qiymətləri isə 28-30 qəpiyə qədər bahalaşıb. Satıcılar bunu mövsümlə əlaqələndirirlər: onların sözlərinə görə, havalar soyuyanda ev şəraitində saxlanılan toyuqlar az yumurtlayır.
Kənd təsərrüfatı mütəxəssisi Vahid Məhərrəmov bildirib ki, kənd yumurtası ilə yanaşı, sənaye üsulu ilə istehsal olunan yumurtalar da bahalaşıb. Onun sözlərinə görə, kənd yumurtasının mövsümlə bağlı bahalaşması təbii olsa da, sənaye yumurtasının bahalaşması vəziyyətdən sui-istifadə halıdır: “Bu, birmənalı olaraq “kartel” sövdələşməsidir. Ona görə ki, sənaye üsulu ilə istehsalda 24 saat ərzində işıqlandırma həyata keçirilir. Orada toyuqların yumurta istehsalında azalma baş vermir”.
Məhərrəmovun sözlərinə görə, son bir ayda bütün tərəvəzlərdə, həmçinin ətdə, müxtəlif meyvələrdə, kartofda, soğanda, kərə və bitki yağlarında, süd məhsullarında ciddi bahalaşma var. Onun açıqladığı rəqəmlərə görə, yumurtanın qiyməti 16 qəpikdən 19 qəpiyə qalxıb, pomidor və xiyar ən azı 30-40 faiz bahalaşıb, ilin əvvəlində 17 manat 50 qəpik olan ət indi 20 manatdır və keçən illə müqayisədə təxminən 20 faiz artıb. Ən ucuz kartofun qiyməti 60 qəpikdən 1 manat 10 qəpiyə, soğanın qiyməti 50-55 qəpikdən 1 manat 10 qəpiyə yüksəlib, yerkökü isə bir ay ərzində 1 manatdan 1 manat 50 qəpiyə qədər bahalaşıb.
Dövlət Statistika Komitəsinin məlumatına görə, 2026-cı ilin ilk doqquz ayında istehlak qiymətləri 5,7 faiz artıb. Bu dövrdə ərzaq inflyasiyası 6,7 faiz təşkil edib, tütün məmulatları 10 faiz, alkoqollu içkilər isə 7,6 faiz bahalaşıb. Məhərrəmov bildirib ki, bahalaşma oktyabr ayında da davam edib və rəsmi göstəricilər qiymətlərin bütün marketlərdə eyni vaxtda endirim olan günlər üzrə qeydə alınması səbəbindən real artımdan aşağı göstərilir.
Mütəxəssis kərə yağının həm istehsalının, həm də idxalının azaldığını, bunun təklifin azalmasına və qiymətin artmasına səbəb olduğunu deyib. Onun sözlərinə görə, bu bazarda da monopoliya var və sahibkarlara digər ölkələrdən nisbətən ucuz məhsul gətirməyə imkan verilmir. Məhərrəmov həmçinin aqrar sektorda mütəxəssis çatışmazlığı, su təminatı, keyfiyyətli toxumun əlçatanlığı, anbar və bazara çıxışla bağlı problemlərin olduğunu bildirib.
Rəsmi statistikaya görə, Azərbaycanda illik inflyasiya sentyabr ayında 5,5 faizə yüksəlib.
