Yəhya Səri: Səudiyyə aviasiyası son 24 saatda Yəmənə 67 hava və raket zərbəsi endirib

Yəmən Silahlı Qüvvələrinin sözçüsü Briqada generalı Yəhya Səri noyabrın 6-da bildirib ki, Səudiyyə hərbi aviasiyası son 24 saat ərzində Yəmənə 67 hava və raket zərbəsi endirib.

Səri bəyan edib ki, zərbələr Taiz, Lahic, Sədə, Cövf və Məarib əyalətlərindəki mülki obyektləri hədəf alıb. Onun sözlərinə görə, zərbələr Xəmis Muşeyt və Taif bazalarından havaya qalxan F-15 və Typhoon təyyarələri ilə endirilib. Səri həmçinin bildirib ki, Yəmənə qarşı eskalasiyanın başlanmasından bəri Səudiyyə hava və raket zərbələrinin ümumi sayı 4264-ə çatıb.

Yəmənin Ali Siyasi Şurası Səudiyyə hərbi aviasiyasının Taiz əyalətinin Vaziiyyə rayonundakı Hədarə bazarında törətdiyi qırğını qətiyyətlə pislədiyini bəyan edib. Şuranın açıqlamasında bildirilib ki, Vaziiyyə bazarına endirilən zərbə nəticəsində onlarla insan şəhid olub və yaralanıb, şəhid və yaralılar arasında qadınlar və uşaqlar var, mağazalara və əmlaka geniş ziyan dəyib.

Ali Siyasi Şura bəyanatında vurğulayıb ki, Yəmən öz xalqını və suverenliyini müdafiə etmək üçün qanuni hüququndan istifadə edəcək. Şura bu eskalasiyaya görə məsuliyyəti Səudiyyə Ərəbistanının üzərinə qoyub.

Yəmən Səhiyyə Nazirliyi daha əvvəl bildirmişdi ki, Səudiyyə təyyarələrinin Taiz əyalətinin qərbindəki Vaziiyyə rayonunda xalq bazarını hədəf alması nəticəsində 30 mülki şəxs şəhid olub, 8 nəfər yaralanıb.

Eyni gündə Yəmən hökumət qüvvələri Taiz əyalətində Husi qruplarını geri çəkilməyə məcbur etdiklərini və Şəqəb və Əqrud cəbhələrində döyüşlərin davam etdiyini bildiriblər.

Yəmən Silahlı Qüvvələri sentyabr ayında da Səudiyyənin bir həftə ərzində Yəmənin doqquz əyalətinə 300 hava zərbəsi endirdiyini açıqlamışdı. Son həftələrdə Yəmən Silahlı Qüvvələri Səudiyyə Ərəbistanının ərazisindəki hədəflərə də raket və pilotsuz uçuş aparatı hücumları həyata keçirdiyini bəyan edib.