Ülvi Həsənlinin 10 saylı Cəzaçəkmə Müəssisəsində cərimə kamerasına salındığı bildirilir

“Abzas Media”nın 9 il azadlıqdan məhrum edilən direktoru Ülvi Həsənlinin saxlanıldığı 10 saylı Cəzaçəkmə Müəssisəsində (CÇM) cərimə kamerasına (“kars”) salındığı bildirilir.

Bu barədə Həsənlinin həyat yoldaşı Rübabə Quliyeva noyabrın 3-də sosial media hesabında məlumat yayıb. Quliyevanın sözlərinə görə, noyabrın 3-ü onların telefon danışığı üçün nəzərdə tutulan gün olsa da, Həsənli zəng etməyib. O bildirib ki, aldığı məlumata əsasən, həyat yoldaşı noyabrın 2-də cərimə kamerasına salınıb.

Rübabə Quliyeva yazıb: “Bu gün Ülvi ilə zəng günümüz idi və o, zəng etməyib. Aldığım məlumata görə, Ülvini noyabrın 2-də karsa salıblar. Ülvini bir müddətdir “Abzas Media”da gedən yazılara görə 10 saylı CÇM rəhbərliyi təhdid edir. Emin Cəfərovun sifarişi ilə müavini Kamran Şahsuvarov dəfələrlə Ülvini təhdid edib və provokasiyaya çəkib”.

Ülvi Həsənli 2023-cü ilin noyabrında “Abzas Media”nın digər əməkdaşları ilə birlikdə həbs edilib və onlara qaçaqmalçılıq ittihamı irəli sürülüb. 2025-ci ilin iyununda Bakı Ağır Cinayətlər Məhkəməsi Həsənlini 9 il azadlıqdan məhrum etmə cəzasına məhkum edib.