Rusiyanın Dneprə zərbəsi: bir nəfər həlak olub, yaralıların sayı 17-yə çatıb

Ukraynanın Dnepr şəhərinə noyabrın 3-də Rusiyanın endirdiyi zərbə nəticəsində bir nəfər həlak olub, yaralıların sayı 17 nəfərə çatıb. Bunu Dnepropetrovsk Vilayət Hərbi Administrasiyasının rəhbəri Aleksandr Hanja bildirib.

Hanjanın sözlərinə görə, xilasedicilər dağıntılar altından bir qadını çıxarıblar, həkimlər ona lazımi yardım göstərirlər. Polis yaralılar arasında iki hüquq-mühafizə orqanı əməkdaşının olduğunu bildirib.

Hanja daha əvvəl yaralıların sayının 15-ə çatdığını, üç kişinin vəziyyətinin ağır olduğunu açıqlamışdı. O, axtarış-xilasetmə əməliyyatının təkrar zərbələr təhlükəsi səbəbindən çətinləşdiyini qeyd etmişdi. Səhər yayılan məlumatda isə yaralılar arasında 80 və 81 yaşlı iki kişinin vəziyyətinin ağır olduğu bildirilmişdi.

Dnepr şəhərinin meri Boris Filatov Rusiya raketinin zədələdiyi hospisin fotolarını paylaşıb. O, tibb müəssisəsində ağır xəstələrin olduğunu bildirib.

Ukrayna Hərbi Hava Qüvvələri bildirib ki, gecə Rusiya Ukraynaya İskander-M/KN-23 ballistik raketləri, Sirkon gəmi əleyhinə raketləri, 59 qanadlı raket və 289 dronla (onlardan 120-si reaktiv) hücum edib. Zərbələrin əsas istiqamətləri Kiyev, Xarkov, Vinnitsa və Dnepropetrovsk vilayətləri olub. Ukrayna tərəfinin məlumatına görə, hava hücumundan müdafiə vasitələri 309 hədəfi zərərsizləşdirib, raket və dronlar 23 məntəqəyə dəyib, 14 məntəqəyə isə qəlpələr düşüb.

Rusiya Müdafiə Nazirliyi isə gecə Ukraynanın Vinnitsa, Dnepropetrovsk və Xarkov vilayətlərində enerji obyektlərinə zərbələr endirildiyini açıqlayıb.