SEPAH Hərbi Dəniz Qüvvələri: Hörmüz boğazından qanunsuz keçməyə cəhd edən üç neft tankeri yanıb

İslam İnqilabı Keşikçiləri Korpusunun (SEPAH) Hərbi Dəniz Qüvvələri noyabrın 3-də Hörmüz boğazından qanunsuz şəkildə keçməyə cəhd edən üç neft tankerinin yandığını açıqlayıb.

Bəyanatda deyilir: «Bu gün səhər saatlarından indiyədək Hörmüz boğazından qanunsuz şəkildə keçməyə cəhd edən üç neft tankeri yanıb». Tankerlərin adları, bayraqları, ekipajlarının vəziyyəti və yanğınların səbəbi barədə məlumat verilməyib.

Bundan əvvəl, oktyabrın 29-da SEPAH Hərbi Dəniz Qüvvələri son 24 saat ərzində üç tankerin Oman sahillərinə yaxın keçən və İranın icazəsiz saydığı cənub marşrutunda minalara toxunduqdan sonra partladığını və alovlandığını bildirmişdi. Həmin bəyanatda gəmilərin radar və naviqasiya sistemlərini söndürdüyü, SEPAH-ın xəbərdarlıqlarına məhəl qoymadığı, marşrutun minalandığı və oradan keçidə görə məsuliyyətin gəmi sahiblərinin və ekipajların üzərinə düşdüyü qeyd olunmuşdu.

Oktyabrın 30-da SEPAH 2 milyon bareldən çox xam neft daşıyan dördüncü tankerin minaya toxunaraq güclü partlayışa məruz qaldığını və yandığını açıqlamışdı. Həmin gün Britaniyanın Dəniz Ticarət Əməliyyatları Mərkəzi (UKMTO) Lavan adasından təxminən 40 dəniz mili cənubda bir gəminin naməlum mərmi ilə vurulduğunu, göyərtəsində yanğın baş verdiyini və ekipajın təhlükəsiz olduğunu bildirmişdi.

Noyabrın 2-də SEPAH Hörmüz boğazında daha bir tankerin minaya toxunduğunu bildirmiş, Britaniya Hərbi Dəniz Qüvvələri isə Oman sahilləri yaxınlığında bir gəmiyə hücum edildiyini açıqlamışdı. Həmin gün İran Xarici İşlər Nazirliyinin sözçüsü İsmayıl Bəqai dəniz blokadası aradan qaldırılmasa, Hörmüz boğazının təhlükəsiz olmayacağını bəyan etmişdi.

İran fevral ayının sonundan bəri Hörmüz boğazından gəmi hərəkətini ciddi şəkildə məhdudlaşdırıb, ABŞ isə İran limanlarını blokadaya alıb. Dünya neft tədarükünün təxminən beşdə biri bu su yolu ilə daşınır.