“Omid” mağazalar şəbəkəsinin rəhbəri Rəhman Məmmədov və satış müdiri həbs edilib

“Omid” Mağazalar Şəbəkəsinin rəhbəri Rəhman Məmmədov və şəbəkənin satış müdiri Tərlan Qasımzadə həbs ediliblər. Onlar işçini döyərək hədə-qorxu ilə ondan pul tələb etməkdə təqsirləndirilirlər.

İş üzrə məlumata görə, Rəhman Məmmədov və Tərlan Qasımzadə Gəncədəki “Omid Gəncə-3” mağazasının müdirini satılan mallardan əldə edilən pulları mənimsəməkdə ittiham ediblər.

Onlar bu məsələ ilə bağlı mağaza müdirini döyüb, müxtəlif vasitələrlə hədə-qorxu gələrək şirkətə vurduğu ziyana görə ondan 88 min manat pul tələb ediblər.

Zərərçəkmiş şəxsin polisə şikayətindən sonra Rəhman Məmmədov və Tərlan Qasımzadə saxlanılıb. Onlara Cinayət Məcəlləsinin 182.2.3-cü (zor tətbiq etməklə hədə-qorxu ilə tələb etmə) maddəsi ilə ittiham irəli sürülüb. Noyabrın 5-i axşam hər ikisi barəsində məhkəmə qərarı ilə 4 aylıq həbs qətimkan tədbiri seçilib.

“Omid” Azərbaycanda təmir, inşaat və məişət əşyalarının topdan və pərakəndə satışı üzrə ən böyük mağazalar şəbəkələrindən biridir. Şirkətin Bakı, Gəncə, Sumqayıt şəhərlərində və rayonlarda 100-ə yaxın filialı var.

Azərbaycan Cinayət Məcəlləsinin 182-ci maddəsi hədə-qorxu ilə tələb etməni cinayət kimi müəyyən edir; maddənin 182.2.3-cü bəndi bu əməlin zor tətbiq etməklə törədilməsinə aiddir.