Yəmən Silahlı Qüvvələri: Əbha hava limanı və Xamis-Muşeyt hava bazası hədəfə alınıb

Yəmən Silahlı Qüvvələrinin sözçüsü, briqada generalı Yəhya Səri noyabrın 3-də Səudiyyə Ərəbistanının ərazisində iki hərbi əməliyyat həyata keçirildiyini açıqlayıb. Onun sözlərinə görə, Əbha Beynəlxalq Hava Limanı pilotsuz uçuş aparatı ilə, Xamis-Muşeyt hava bazası isə ballistik raketlə hədəfə alınıb.

Yəhya Səri bəyanatında bildirib: «Yəmən Silahlı Qüvvələri iki hərbi əməliyyat həyata keçirib. Birinci əməliyyatda Əbha Beynəlxalq Hava Limanı pilotsuz uçuş aparatı ilə hədəfə alınıb, zərbə dəqiq olub və hava limanında uçuşların dayanmasına səbəb olub. Digər əməliyyatda isə Xamis-Muşeyt hava bazası ballistik raketlə hədəfə alınıb və zərbə birbaşa olub».

Səri həmin gün daha əvvəl Yəmən Silahlı Qüvvələrinin Səudiyyə zabiti Bədr əl-Hərbiyə tabe olan qüvvələrin Ras əl-Ara və Əl-Mudariba bölgələrindəki cəmləşmələrini bir neçə ballistik raketlə vurduğunu açıqlamışdı. Onun sözlərinə görə, zərbələr nəticəsində aralarında komandirlərin də olduğu onlarla nəfər ölüb və yaralanıb.

Sözçü, həmçinin Əl-Cövf vilayətinin şərqində Səudiyyə zabiti Faris əş-Şəmriyə tabe olan qüvvələrin cəmləşmələrinin ballistik raketlərlə hədəfə alındığını bildirib. Onun sözlərinə görə, zərbələr birbaşa olub, çox sayda ölən və yaralanan var, bir sıra hərbi texnika məhv edilib və yandırılıb.

Əbha Səudiyyə Ərəbistanının cənub-qərbində yerləşən Əsir vilayətinin inzibati mərkəzidir. Xamis-Muşeyt şəhəri də həmin vilayətdə yerləşir və Kral Xalid hava bazasına ev sahibliyi edir. Hər iki obyekt əvvəlki illərdə də dəfələrlə Yəmən tərəfinin hücumlarına məruz qalıb.

Yəmən ilə Səudiyyə Ərəbistanı arasında hərbi qarşıdurma son həftələrdə kəskinləşib. Oktyabrın 7-də də Yəmən Silahlı Qüvvələri Səudiyyə hava limanlarına və hərbi bazasına hücumlar etdiklərini açıqlamışdılar. Səna hökuməti noyabrın 2-də son 24 saat ərzində Səudiyyə zərbələri nəticəsində 76 mülki şəxsin həlak olduğunu və yaralandığını bildirmişdi.