Rusiyanın İşgəncənin qarşısının alınması haqqında Avropa Konvensiyasından çıxması qüvvəyə minib

Rusiyanın İşgəncənin və qeyri-insani və ya ləyaqəti alçaldan rəftar və ya cəzanın qarşısının alınması haqqında Avropa Konvensiyasından çıxması 1 noyabr 2026-cı il tarixindən qüvvəyə minib.

Rusiya hakimiyyəti 2025-ci il oktyabrın 30-da Avropa Şurasına konvensiyanı denonsasiya etdiyini rəsmi şəkildə bildirmişdi. Denonsasiya 1 noyabr 2026-cı il qüvvəyəminmə tarixi ilə qeydiyyata alınıb. Konvensiyanın 22-ci maddəsinə əsasən, çıxma Avropa Şurasının Baş katibinin bildirişi aldığı tarixdən 12 ay sonra qüvvəyə minir və bu müddət ərzində dövlət konvensiyanın öhdəlikləri ilə bağlı qalır.

Bu addımla Rusiya azadlıqdan məhrumetmə yerlərinin müstəqil xarici nəzarətini artıq qəbul etmir. Konvensiya əsasında yaradılmış Avropa İşgəncənin Qarşısının Alınması Komitəsi iştirakçı dövlətlərdə həbsxanalara, təcridxanalara və digər saxlanma yerlərinə səfərlər edərək məhbuslarla rəftarı yoxlayır. Rusiyanın bu komitə ilə tez-tez əməkdaşlıq etmədiyi bildirilir.

Rusiya konvensiyaya 1998-ci ildə qoşulmuşdu. 2025-ci ilin sentyabrında Vladimir Putin konvensiyanın denonsasiyası haqqında qanunu imzalamışdı.

Rusiya 2022-ci il martın 16-da Avropa Şurasından xaric edilib, həmin il sentyabrın 16-da isə İnsan Hüquqları üzrə Avropa Konvensiyasının iştirakçısı olmaqdan çıxıb. İşgəncənin qarşısının alınması haqqında Avropa Konvensiyası 1987-ci ildə qəbul edilib və 1989-cu ildə qüvvəyə minib.