Rusiya Dnepropetrovsk vilayətinin enerji obyektlərinə yenidən hücum edib, Dnepr və Kamyanskenin bir hissəsi işıqsızdır

Rusiya oktyabrın 31-nə keçən gecə Ukraynanın Dnepropetrovsk vilayətindəki enerji obyektlərinə yenidən hücum edib. Ukraynanın DTEK enerji şirkəti bildirib ki, yeni hücumlar nəticəsində enerji avadanlığı ciddi zədələnib.

Şirkətin məlumatına görə, zədələnən obyektlər arasında "DTEK Dnepr Elektrik Şəbəkələri"nə məxsus iki obyekt var. Onlardan biri energetiklərin təxminən iki sutka ərzində bərpa işləri apardığı obyektdir.

Dnepr və Kamyanske şəhərlərinin əhəmiyyətli hissəsi, həmçinin Dnepr və Samarivski rayonlarının sakinləri hələ də elektrik enerjisi olmadan qalır.

Həmin gecə Rusiya Müdafiə Nazirliyi Rusiya Silahlı Qüvvələrinin Ukraynanın hərbi-sənaye kompleksinin maraqları üçün istifadə olunan logistika və enerji infrastrukturu obyektlərinə zərbələr endirdiyini açıqlayıb. Nazirlik Kiyevdə TEC-6-nın, Xarkovda sənaye zonasının və Odessa yaxınlığında yük gəmisinin vurulduğunu bildirib.

Bundan əvvəl, oktyabrın 30-da axşam saatlarında Dnepr şəhərindəki dəmiryol vağzalı ardıcıl olaraq yenidən zərbəyə məruz qalıb, zərbələrdən biri sərnişin qatarına dəyib. Kamyanske Dnepr şəhərindən qərbdə, Dnepr çayı sahilində yerləşən sənaye şəhəridir.