Noyabrın 1-dən Bakı–Tiflis–Bakı marşrutunda yeni qatar işləyəcək, gündəlik reyslərin sayı dördə çatacaq
Yeni gündüz qatarı Bakıdan saat 09:10-da yola düşəcək, marşrutda oturacaq sayı 386-dan 564-ə yüksələcək.
Noyabrın 1-dən Bakı–Tiflis–Bakı beynəlxalq sərnişin marşrutu üzrə yeni qatarın hərəkətinə başlanılacaq.
“Azərbaycan Dəmir Yolları” QSC-nin məlumatına görə, bununla marşrutda gündəlik reyslərin sayı ikidən dördə çatacaq. Sərnişinlər üçün oturacaqların sayı 386-dan 564-ə, yəni təxminən 50 faiz artacaq.
Yeni qatar Bakıdan hər gün saat 09:10-da yola düşərək Tiflisə 19:11-də çatacaq. Geri istiqamətdə qatar Tiflisdən saat 22:00-da yola düşəcək və ertəsi gün 07:57-də Bakıya çatacaq. Mövcud qatar isə Bakıdan 23:00-da yola düşərək ertəsi gün 08:41-də Tiflisə, Tiflisdən 11:00-da yola düşərək 20:26-da Bakıya çatır.
Yeni qatarda standart, standart+ və biznes sinif vaqonlar olacaq. Əvvəllər plaskart adlanan standart sinifdə qiymətlər 36 manatdan başlayır və digər seçimlərlə müqayisədə 30 faizə qədər aşağıdır.
Standart sinifdə Tiflisə birtərəfli biletin minimal qiyməti Bakıdan 54 manat, Yevlaxdan 44 manat, Gəncədən 41 manat, Ağstafadan 38 manat, Böyük Kəsikdən 36 manat təşkil edir. Müqayisə üçün, Stadler vaqonlarında komfort sinifdə Bakıdan Tiflisə bilet 77,50 manatdan, Gəncədən 56,80 manatdan başlayır.
Yeni reyslərə biletlərin satışına oktyabrın 2-də başlanılıb. Onlayn bilet almaq üçün qeydiyyatdan keçmiş istifadəçilər hesablarını MyGov ID vasitəsilə təsdiqləməlidirlər. Əcnəbi vətəndaşlar isə vətəndaşı olduqları ölkəni və həmin ölkədə qeydiyyatda olan telefon nömrəsini daxil edib onu SMS ilə göndərilən birdəfəlik kodla təsdiqləməlidirlər.
Şirkət əlavə reyslərin beynəlxalq səfərlərə artan tələbatla bağlı olduğunu və tərəflərin uzun müddət apardığı birgə hazırlıq, texniki və təşkilati işlər nəticəsində mümkün olduğunu bildirib.
Bakı ilə Tiflis arasında sərnişin qatarlarının hərəkəti 2020-ci ildə dayandırılmışdı. Təxminən altı illik fasilədən sonra gündəlik sərnişin qatarlarının 2026-cı il mayın 26-dan bərpası Gürcüstanın Baş naziri İrakli Kobaxidzenin Azərbaycana dövlət səfəri zamanı elan edilmişdi. Həmin səfər çərçivəsində Gürcüstanın iqtisadiyyat və davamlı inkişaf naziri Mariam Kvrivişvili və Azərbaycanın rəqəmsal inkişaf və nəqliyyat naziri Rəşad Nəbiyev Bakı–Tbilisi–Qars dəmir yolunun yenilənmiş hissəsinin tam istismara verilməsinə dair protokol imzalamışdılar.
