UKMTO: Hörmüz boğazında kiçik qayıqdan tankerin gövdəsinə iki partlayıcı qurğu bərkidilib
Partlayışlar nəticəsində tankerin mühərrik otağında yanğın baş verib və gəmi müvəqqəti hərəkətsiz qalıb; heyət üzvləri təhlükəsizdir.
Britaniya Hərbi Dəniz Qüvvələrinin Dəniz Ticarəti Əməliyyatları İdarəsi (UKMTO) Hörmüz boğazında neft tankerinin gövdəsinə kiçik qayıqdan bərkidilən partlayıcı qurğuların partladığını bildirib.
Açıqlamada deyilir: “Kiçik bir qayıqla neft tankerinə yaxınlaşaraq onun su xəttindən yuxarıda yerləşən gövdəsinə iki partlayıcı qurğu bərkidilib. Sonrakı partlayışlar nəticəsində mühərrik otağında yanğın baş verib və gəmi hərəkətsiz vəziyyətə düşüb.”
UKMTO-nun məlumatına görə, hadisə oktyabrın 29-da UTC vaxtı ilə təxminən saat 22:12-də Omanın Xəsab şəhərindən 25 dəniz mili şimal-şərqdə baş verib. Qayıq tankerə sol bortdan yaxınlaşıb. İdarənin ilkin məlumatında boğazdan çıxan tankerdə yanğın başladığı, yanğının səbəbi, heyətin vəziyyəti və dəymiş ziyanın isə məlum olmadığı bildirilmişdi.
Oktyabrın 30-da yayılan yenilənmiş məlumata görə, bütün heyət üzvləri təhlükəsizdir, yanğın söndürülüb, ətraf mühitə təsir qeydə alınmayıb və gəmi növbəti limana doğru yoluna davam edir. Tankerin adı və hücumu kimin törətdiyi açıqlanmayıb.
UKMTO gəmilərə “ehtiyatla keçməyi və səlahiyyətli orqanlar araşdırma apararkən istənilən şübhəli fəaliyyət barədə UKMTO-ya məlumat verməyi” tövsiyə edib.
İran Ordusunun Hərbi Dəniz Qüvvələrinin İctimaiyyətlə Əlaqələr Şöbəsi isə boğazın şərqindəki məhdudlaşdırılmış ərazidə tankerin dəniz minasına toxunduqdan sonra alovlandığını bildirib. İran hərbi dəniz rəsmiləri boğazın koordinasiya olmadan qadağan olunmuş ərazilərdən keçən “qaydaları pozan gəmilər üçün bağlı” olduğunu bəyan ediblər.
Oktyabrın 30-da İran İnqilab Keşikçiləri Korpusu da icazəsiz marşrutla keçən üç neft tankerinin gün ərzində partlayış və yanğınla üzləşdiyini açıqlamışdı. Korpusun bildirdiyinə görə, onlardan biri 2 milyon bareldən çox neft yüklü olub və boğazın girişində yanmaqda davam edib. Hörmüz boğazındakı hadisələr fonunda neftin qiyməti barel üçün 118 dollara yaxınlaşıb. Fars körfəzini Oman körfəzi ilə birləşdirən Hörmüz boğazı dünyanın ən mühüm neft daşıma yollarından biridir.
