Jurnalist Əfqan Sadıqov səsləndirdiyi şüarlara görə məhkəmə zalından çıxarılıb, iclas noyabrın 16-na təxirə salınıb

Noyabrın 3-də Lənkəran Ağır Cinayətlər Məhkəməsində jurnalist, Azel TV-nin baş redaktoru Əfqan Sadıqovun cinayət işi üzrə baxış iclası keçirilib. Sadıqov iclas zamanı səsləndirdiyi şüarlara görə hakimin əmri ilə məhkəmə zalından çıxarılıb.

Yaxınlarının verdiyi məlumata görə, Əfqan Sadıqov məhkəmə zalına əlləri qandallı vəziyyətdə beş konvoy əməkdaşının müşayiəti ilə gətirilib və şüşə kabinəyə salınıb. Vəkil Nemət Kərimlinin vəsatəti ilə hakim Ənnağı Məmmədli onun şüşə kabinədən çıxarılmasına icazə verib. Sadıqov vəkilinin yanında əyləşdirilsə də, əllərindəki qandal açılmayıb.

Hakim iş üzrə yeddi nəfərin zərərçəkmiş şəxs kimi tanındığını, onlardan üçünün iclasda iştirak etdiyini bildirib. Dövlət ittihamçısı Taleh Səfərov ittiham aktının nəticə hissəsini oxuyub. Sadıqov ittihamda yazılanların hamısının yalan olduğunu, jurnalist fəaliyyətinə görə İlham Əliyevin göstərişi ilə həbs olunduğunu deyib, bundan sonra hakimin göstərişi ilə yenidən şüşə kabinəyə salınıb.

Vəkil Nemət Kərimli indiyədək müvəkkili ilə görüşə bilmədiyini və onunla konfidensial ünsiyyət qurmaq istədiyini bildirərək iclasın təxirə salınmasını xahiş edib. Dövlət ittihamçısı vəsatəti əsassız adlandırıb, məhkəmə tərkibi müşavirədən sonra iclası davam etdirmək qərarına gəlib. Sadıqov qərara etiraz edərək bunun məhkəmə olmadığını deyib, İlham Əliyevi və Dövlət Təhlükəsizliyi Xidmətinin rəisi Əli Nağıyevi “quldurlar” adlandırıb, “Rədd olsun diktatura!” və “Siyasi məhbuslara azadlıq!” şüarlarını səsləndirib.

Hakim onun zaldan çıxarılmasını əmr edib, konvoy əməkdaşları Sadıqovu itələyərək zaldan aparıblar; o, çıxarılarkən də eyni şüarları səsləndirməyə davam edib. Bundan sonra vəkil müdafiə hüququnun pozulduğunu bildirərək yenidən iclasın təxirə salınmasını istəyib. Hakim bu dəfə vəsatəti təmin edib və iclas noyabrın 16-na təxirə salınıb.

Əfqan Sadıqov “Azel TV” onlayn xəbər saytının və eyniadlı YouTube kanalının təsisçisi və baş redaktorudur. Materiallarında əsasən korrupsiya halları, sosial problemlər və məmurların fəaliyyəti ilə bağlı tənqidi süjetlər yayımlayırdı.

O, 2020-ci ilin mayında saxlanılaraq hədə-qorxu ilə pul tələb etmə ittihamı ilə 7 il azadlıqdan məhrum edilib, iki il sonra İlham Əliyevin əfv sərəncamı ilə azadlığa buraxılıb. Təzyiqlər səbəbindən 2023-cü ilin dekabrında ailəsi ilə Gürcüstana köçüb. 2024-cü ilin mayında Azərbaycanda ona qarşı yenidən hədə-qorxu ilə tələb etmə ittihamı ilə cinayət işi başlanıb; həmin ilin avqustunda Azərbaycanın ekstradisiya sorğusu əsasında Gürcüstanda saxlanılıb, Avropa İnsan Hüquqları Məhkəməsinin qadağası ilə 2025-ci ilin aprelində girov müqabilində sərbəst buraxılıb.