Cəmil Həsənli: Bacım oğlu Biləsuvar polisində döyülüb, Əli Kərimlinin və mənim əleyhimə danışmağa məcbur ediblər

Milli Şuranın sədri Cəmil Həsənli bacısı oğlu Aqil Əliyevin polis əməkdaşları tərəfindən saxlanıldığını və Biləsuvar Rayon Polis Şöbəsində döyüldüyünü bildirib. O, bu barədə noyabrın 6-da sosial şəbəkə hesabında paylaşım edib.

Cəmil Həsənlinin sözlərinə görə, bacısı oğlundan Azərbaycan Xalq Cəbhəsi Partiyasının (AXCP) həbsdə olan sədri Əli Kərimliyə qarşı çıxış etməsi istənilib. O yazıb: “Görünür, bunlar Əli bəyin məhkəməsi dövründə ona qarşı “ümummilli” kampaniya hazırlayırlar. Dünən Biləsuvarda bir dəstə polis əməkdaşı idman zalına gəlib mənim bacım oğlu Aqil Əliyevi polis şöbəsinə aparıb. Orada ona deyiblər ki, çıx televiziyada Əli Kərimlinin və dayın Cəmil Həsənlinin əleyhinə çıxış et. De ki, Əli Kərimli və Cəmil Həsənli xalqı pis yola çəkir. Əli Kərimli həbsdə olsa da, Cəmil Həsənli öz çıxışları ilə gəncləri aldadır, onları pis yola çəkir. Çıx gənclərə müraciət et ki, onlara inanmasınlar və sən də inanmadığını bildir”.

Onun iddiasına görə, Aqil Əliyev bundan imtina etdikdən sonra Biləsuvar Rayon Polis Şöbəsinin rəisi Nəsib Məmmədovun göstərişi ilə döyülüb və iki qızı ilə hədələnib. Cəmil Həsənli həmçinin Aqil Əliyevin avtomobilinin polis şöbəsində saxlanıldığını bildirib. Dediyinə görə, bacısı oğlunun bədəni qançır-qançırdır.

Cəmil Həsənli əlavə edib ki, Aqil Əliyevə qarşı oxşar təzyiqlər əvvəllər də olub. Onun sözlərinə görə, bir neçə il əvvəl Aqilin toy mərasimi ərəfəsində polis əməkdaşları dayısı Cəmil Həsənlinin toya qatılmamasını tələb ediblər. Həsənli baş verənləri Əli Kərimlinin məhkəmə prosesi ərəfəsində ona və yaxınlarına qarşı aparılan kampaniyanın tərkib hissəsi kimi qiymətləndirib.

Daxili İşlər Nazirliyi və Biləsuvar Rayon Polis Şöbəsi iddialarla bağlı mövqe açıqlamayıb.

Cəmil Həsənli bir gün əvvəl də ölkədən çıxışına qoyulan qadağa ilə bağlı paylaşım etmişdi. O, bu məhdudiyyətə görə 2027-ci il yanvarın 7-10-da ABŞ-ın Nyu-Orlean şəhərində keçiriləcək Amerika Tarix Cəmiyyətinin illik toplantısında iştirak edə bilməyəcəyini bildirmişdi. Onun sözlərinə görə, 2025-ci il noyabrın 30-da Prezident Administrasiyasının sabiq rəhbəri Ramiz Mehdiyev barəsində aparılan istintaq çərçivəsində şahid qismində ifadəsi alınıb və ölkədən çıxışına qadağa qoyulub.

Ramiz Mehdiyev dövlətə xəyanət, hakimiyyəti zorla ələ keçirməyə cəhd və cinayət yolu ilə əldə edilmiş əmlakın leqallaşdırılması maddələri ilə ittiham olunub və ötən ay 14 il müddətinə şərti azadlıqdan məhrumetmə cəzasına məhkum edilib. AXCP sədri Əli Kərimli və onun müavini Məmməd İbrahim isə 2025-ci ilin noyabr ayının sonunda həbs olunublar. Hər iki şəxsə Cinayət Məcəlləsinin 278.1-ci maddəsi ilə – hakimiyyəti zorla ələ keçirməyə və ya dövlətin konstitusiya quruluşunu zorla dəyişdirməyə yönələn hərəkətlərə görə yekun ittiham verilib. Bu maddə 20 ilədək və ya ömürlük azadlıqdan məhrumetmə cəzası nəzərdə tutur.