Zelenski Putinlə Türkiyədə görüşməyə hazır olduğunu bildirib

Ukrayna Prezidenti Volodimir Zelenski 1 noyabrda Türkiyə televiziyasına verdiyi müsahibədə Rusiya Prezidenti Vladimir Putinlə Türkiyədə görüşməyə hazır olduğunu bildirib. O, Türkiyə Prezidenti Rəcəb Tayyib Ərdoğanın liderlər zirvəsinin təşkilinə kömək edə biləcəyinə ümid etdiyini vurğulayıb.

«Əgər Türkiyə bunu reallaşdıra bilsə, biz bunu qəbul edərik və yalnız sevinərik», – deyə Zelenski bildirib. O, Türkiyəni tərəf tutmayan praktik vasitəçi kimi xarakterizə edib və bəzi məsələlərin texniki qruplar səviyyəsində həll oluna bilmədiyini, buna görə liderlərin görüşünün zəruri olduğunu deyib.

Zelenski həmçinin nəzarət mexanizmi ilə tam və qeyd-şərtsiz atəşkəs istədiklərini, Ukraynanın Krım da daxil olmaqla ərazilərindən imtina etməyəcəyini bildirib.

Ukrayna Prezidenti eyni gün bəyan edib ki, Vaşinqton Rusiyanın neft emalı zavodlarının hədəf alınmamasını istəyirsə, Moskva Ukraynanın enerji sisteminə hücumlarını dayandırmalıdır. O, həmçinin ABŞ-a Patriot raketləri almaq təklifini təqdim etdiklərini və bunun üçün lazımi maliyyəni təmin etməyə hazır olduqlarını deyib.

Kreml Türkiyədə görüş təklifinə hələlik birbaşa cavab verməyib. Moskva bundan əvvəl danışıqların ilk raundlarının ABŞ-ın iştirakı ilə üçtərəfli formatda keçirilməsini istədiyini bildirib. Ukrayna noyabrın birinci yarısında ABŞ və Rusiya ilə üçtərəfli görüşə hazırlaşır.

Zelenski oktyabrın 31-də İstanbulda Rəcəb Tayyib Ərdoğanla görüşüb; tərəflər Qara dəniz taxıl dəhlizinin bərpası üzərində işi davam etdirməyə razılaşıblar. Türkiyə 2022-ci ildə İstanbulda Rusiya və Ukrayna nümayəndə heyətləri arasında danışıqlara ev sahibliyi edib, həmin il BMT ilə birlikdə Qara dəniz taxıl razılaşmasına vasitəçilik edib.