Zelenski: Ukrayna qüvvələri «Kamenski» kombinatını və Rostov vilayətində Rusiyanın HHM obyektlərini vurub

Ukrayna Prezidenti Volodimir Zelenski noyabrın 1-də Ukrayna Müdafiə Qüvvələrinin Rusiyanın raket istehsalına cəlb olunmuş «Kamenski» kombinatını, eləcə də Rostov vilayətində Rusiyanın hava hücumundan müdafiə (HHM) obyektlərini vurduğunu bildirib.

Zelenskinin sözlərinə görə, Ukrayna hərbçiləri «Pantsir-S2» zenit kompleksini və S-400 «Triumf» sisteminin komanda-qərargah maşınını uğurla vurublar. Məhv edilmiş HHM obyektlərinin ümumi dəyəri təxminən 70 milyon dollar qiymətləndirilir.

Həmin gün Rusiya Müdafiə Nazirliyi Rusiya Silahlı Qüvvələrinin Odessadan 16 kilometr aralıda Ukrayna Silahlı Qüvvələri üçün yük daşıyan quru yük gəmisini vurduğunu bildirib. Ukrayna tərəfi isə Rusiyanın Ternopil vilayətinə hücumu nəticəsində Kremenets icmasında energetika obyektinin vurulduğunu, 12 yaşayış məntəqəsinin tam və ya qismən elektriksiz qaldığını açıqlayıb.

Zelenski bu gün daha əvvəl bir həftə ərzində Rusiya ordusunun Ukraynaya 1940 zərbə PUA-sı, 1580-dən çox idarə olunan aviasiya bombası (KAB) və 44 raket buraxdığını bildirmişdi.

«Kamenski» kombinatı Rostov vilayətinin Kamensk-Şaxtinski şəhərində yerləşən kimya müəssisəsidir. Rusiya Müdafiə Nazirliyi 2024-cü ilin dekabrında Ukraynanın ATACMS və Storm Shadow raketləri ilə bu müəssisəyə zərbə endirdiyini bildirmişdi.

«Pantsir-S2» qısa mənzilli zenit raket-top kompleksidir. S-400 «Triumf» isə Rusiyanın uzaq mənzilli zenit-raket sistemidir.