Zelenski: Bir həftədə Rusiya Ukraynaya 1940 zərbə PUA-sı, 1580-dən çox KAB və 44 raket buraxıb
Volodimir Zelenski bildirib ki, raketlərdən 36-sı ballistik olub, Rusiya ordusu yenə də enerji infrastrukturuna zərbələr endirib.
Ukrayna Prezidenti Volodimir Zelenski bildirib ki, ötən həftə ərzində Rusiya ordusu Ukraynaya 1940 zərbə PUA-sı, 1580-dən çox idarə olunan aviasiya bombası (KAB) və müxtəlif tipli 44 raket buraxıb.
Zelenskinin Telegram hesabında paylaşdığı məlumata görə, buraxılan 44 raketdən 36-sı ballistik raket olub.
Ukrayna Prezidenti bildirib ki, rus hərbçiləri yenə də ukraynalıların yaşayış evlərini elektrik enerjisi ilə təmin edən yarımstansiyalara, transformatorlara və elektrik ötürücü xətlərinə zərbələr endirib.
1 noyabrda Kiyevdə PUA təhlükəsi səbəbindən hava hücumu həyəcan siqnalı elan edilib.
Son sutkada tərəflər bir-birinin ərazisinə zərbələrlə bağlı açıqlamalar veriblər. 31 oktyabr axşamı Kramatorsk şəhər hərbi administrasiyasının rəhbəri Oleksandr Honçarenko Rusiyanın şəhərə aviazərbə endirdiyini bildirib. Rusiyanın Nijni Novqorod vilayətinin qubernatoru isə 1 noyabr gecəsi PUA hücumu nəticəsində vilayətdə sənaye müəssisəsinin zədələndiyini açıqlayıb.
Rusiya 24 fevral 2022-ci ildə Ukraynaya qarşı genişmiqyaslı hərbi əməliyyatlara başlayıb. Zelenski Rusiyanın həftə ərzində Ukraynaya buraxdığı PUA, aviasiya bombası və raketlərin sayını mütəmadi olaraq açıqlayır.
