Qətərin Nakilat şirkəti: Gəmimiz Fars körfəzində naməlum obyektlərlə hücuma məruz qalıb

Qətər Qaz Daşıma Şirkəti (Nakilat) gəmilərindən birinin Fars körfəzində naməlum obyektlərlə hücuma məruz qaldığını bildirib.

Şirkətin açıqlamasına görə, hücum ötən cümə günü, 30 oktyabr axşam saatlarında, gəmi Fars körfəzində üzərkən baş verib. Gəminin adı, dəymiş zərər və ekipajın vəziyyəti barədə əlavə məlumat verilməyib.

Nakilat Qətərin maye qaz daşıyan gəmilərini idarə edən dövlət şirkətidir və dünyanın ən böyük maye təbii qaz (LNG) daşıyıcı donanmalarından birinə malikdir.

Şirkətin gəmiləri bu ilin əvvəlində də hücuma məruz qalıb. İyulun 7-də Hörmüz boğazından keçən «Al Rekayyat» maye qaz daşıyıcısı mərmi ilə vurulub. Nakilat o zaman ekipaj üzvlərindən heç kimin xəsarət almadığını və ətraf mühitə təsir olmadığını bildirmişdi.

Son günlərdə bölgədə gəmilərlə bağlı insidentlər artıb. Oktyabrın 31-də İran İnqilab Keşikçiləri Korpusu Hörmüz boğazında dördüncü tankerin partladığını, son 48 saatda 8 tankerin partladığını açıqlayıb. Noyabrın 1-də isə Hörmüzgan əyalətinin Sirik liman idarəsi səhər saat 07:00 radələrində Ziyarət kəndi sahilindən 2 mil aralıda yanacaq daşıyan bir gəmidə yanğın baş verdiyini, ekipajın xilasetmə yardımı çağırışı etmədiyini bildirib.