Yəhya Səri: Səudiyyə aviasiyası 24 saatda Yəmənə 75 hava və raket zərbəsi endirib

Yəmən Silahlı Qüvvələrinin sözçüsü, briqada generalı Yəhya Səri 1 noyabr axşamı bildirib ki, Səudiyyə hərbi aviasiyası son 24 saat ərzində Yəməndəki mülki obyektlərə 75 hava və raket zərbəsi endirib.

Səri açıqlamasında qeyd edib ki, zərbələr Sədə, Təiz, Əmran, İbb, Zamar, Lahic, Hudeydə və əl-Cövf vilayətlərində cəmlənib.

Sözçünün sözlərinə görə, hava zərbələri Xəmis Muşeyt və Taif aviabazalarından havaya qalxan F-15 və «Typhoon» təyyarələri ilə həyata keçirilib, raket zərbələri isə Cazandan endirilib.

Səri həmçinin bildirib ki, Yəmənə qarşı eskalasiya başlayandan bəri Səudiyyə tərəfinin hava zərbələrinin və raket atəşlərinin ümumi sayı 3830-a çatıb.

Bu açıqlamadan sonra Yəmən tərəfi Səudiyyə hərbi təyyarələrinin Hudeydə vilayətindəki Rəs İsa limanına iki hava zərbəsi endirdiyini, ayrıca bir zərbənin isə Sədə şəhərinin cənub-şərqindəki rabitə şəbəkəsini hədəf aldığını bildirib.

Bundan əvvəl, 1 noyabr gündüz saatlarında Səudiyyə aviasiyasının Hudeydə Universitetinin Tibb və Səhiyyə Elmləri Fakültəsini hədəf aldığı bildirilmişdi. Sənadakı hökumətin Səhiyyə Nazirliyi Təiz vilayətinin Cəbəl Həbəşi rayonundakı əl-Unayn ərazisinə endirilən zərbələr nəticəsində bir uşağın şəhid olduğunu, iki qız uşağının yaralandığını açıqlamışdı. Həmin gün Səudiyyə Ərəbistanı ölkənin cənub bölgəsinin Yəmən tərəfindən ballistik raket hücumuna məruz qaldığını bəyan etmişdi.

Yəhya Səri 18 sentyabrda da Səudiyyə aviasiyasının bir həftə ərzində Yəmənə 300 hava zərbəsi endirdiyini, zərbələrin Xəmis Muşeyt və Taif bazalarından qalxan F-15 və «Typhoon» təyyarələri ilə həyata keçirildiyini bildirmişdi. Rəs İsa Yəmənin Qırmızı dəniz sahilində, Hudeydə vilayətində yerləşən neft limanıdır.