Səudiyyə zərbələri: Hudeydə Universitetinin Tibb fakültəsi hədəf alınıb, Təizdə bir uşaq şəhid olub

Noyabrın 1-də Səudiyyə Ərəbistanının hərbi aviasiyası Yəmənin qərbindəki Hudeydə vilayətində və cənub-qərbindəki Təiz vilayətində zərbələr endirib.

Hudeydədəki yerli hakimiyyət orqanları bildirib ki, Səudiyyə aviasiyası Yəmənin qərbində yerləşən Hudeydə Universitetinin Tibb və Səhiyyə Elmləri Fakültəsini hədəf alıb. Yerli hakimiyyətin açıqlamasında itkilər barədə məlumat yer almayıb.

Sənadakı hökumətin Səhiyyə Nazirliyi Təiz vilayətinin Cəbəl Həbəşi rayonundakı əl-Unayn ərazisinə Səudiyyə hava zərbələri nəticəsində bir uşağın şəhid olduğunu, iki qız uşağının yaralandığını açıqlayıb.

Həmin gün səhər saatlarında Səudiyyə qırıcıları Hudeydə vilayətinin Bacil rayonunda Yəmən Neft Şirkətinin stansiyasını iki hava zərbəsi ilə vurub, hücum nəticəsində üç mülki şəxs yaralanıb. Səudiyyə tərəfi isə gün ərzində Yəməndən ölkənin cənub bölgəsinə ballistik raket atıldığını və hava hücumundan müdafiə sistemlərinin onu ələ keçirib məhv etdiyini bildirib.

Hudeydə Qırmızı dəniz sahilində yerləşən liman şəhəridir və Yəmənin əsas limanlarından biri sayılır. Təiz Yəmənin ən böyük şəhərlərindən biridir; Təiz valisi bu gün şəhərdəki xəstəxanaların yalnız 20 faizinin işlədiyini, yüzlərlə tibb müəssisəsinin xidmət göstərməyi dayandırdığını bildirib.