Zelenski Ərdoğanla danışıqlar üçün İstanbula gəlib, gündəmdə Qara dənizdə gəmiçilik var

Ukrayna Prezidenti Volodimir Zelenski oktyabrın 31-də Ukrayna nümayəndə heyəti ilə birlikdə İstanbula gəlib. Burada onun Türkiyə Prezidenti Rəcəb Tayyib Ərdoğanla danışıqları keçiriləcək.

Zelenskinin sözlərinə görə, Qara dənizdə gəmiçiliklə bağlı mühüm məsələlər var. Səfər proqramına Ekumenik Patriarx I Varfolomeylə görüş də daxildir.

Yayılan görüntülərdə Ukrayna Prezidentinin hava limanında təyyarədən endikdən sonra türk rəsmiləri tərəfindən qarşılandığı görünür.

Səfər Ərdoğanın dəvəti ilə baş tutur. Bir gün əvvəl görüşdə Rusiya–Ukrayna müharibəsinin və Qara dəniz təhlükəsizliyinin müzakirə olunacağı bildirilmişdi.

Səfər Rusiyanın Ukraynanın enerji obyektlərinə gecə hücumları fonunda baş tutur. Ukrayna tərəfi bildirib ki, oktyabrın 31-nə keçən gecə Rusiya Dnepropetrovsk vilayətindəki enerji obyektlərinə yenidən hücum edib və enerji avadanlığı ciddi zədələnib.

Türkiyə müharibə dövründə tərəflər arasında vasitəçilik edib. 2022-ci ilin martında İstanbulda Rusiya və Ukrayna nümayəndə heyətləri arasında danışıqlar keçirilib. Həmin il iyulun 22-də İstanbulda BMT və Türkiyənin vasitəçiliyi ilə Qara dəniz taxıl təşəbbüsü imzalanıb, Rusiya 2023-cü ilin iyulunda bu sazişdən çıxıb.

2025-ci ilin may–iyul aylarında İstanbulda Rusiya və Ukrayna nümayəndə heyətləri arasında üç raund birbaşa danışıqlar keçirilib, onların nəticəsində əsir mübadilələri aparılıb.