Taizin cənubunda Əl-Məxaf bazarı hədəfə alınıb: şəhidlər və yaralılar var, tərəflər bir-birini günahlandırır

Yəmənin Taiz vilayətinin cənubundakı Məsrax rayonunun Əl-Məxaf bölgəsində bazar hədəfə alınıb, nəticədə şəhidlər və yaralılar var.

Səna tərəfi bildirib ki, Əl-Məxaf bölgəsinin bazarı Səudiyyə Ərəbistanı tərəfindən hədəfə alınıb. Səna tərəfi ölən və yaralananların sayını açıqlamayıb.

Yəmənin Səudiyyə Ərəbistanı tərəfindən dəstəklənən hökumətinə yaxın tərəf isə Məsrax rayonunun Əl-Əqrud bölgəsindəki Əl-Məxaf kəndində yerləşən Ən-Nəcd bazarına Ənsarullah tərəfindən atılan mərminin düşdüyünü iddia edib. Bu tərəfin məlumatına görə, aralarında uşaqların da olduğu 25 mülki şəxs həlak olub və ya yaralanıb.

Məsrax rayonu son günlərdə də zərbələrə məruz qalıb. Oktyabrın 24-də Səna tərəfi Səudiyyə aviasiyasının Məsrax rayonunun Əl-Əqrud bölgəsində bir evə endirdiyi zərbə nəticəsində 4 nəfərin şəhid olduğunu, 5 nəfərin yaralandığını bildirmişdi. Sentyabrın 27-də isə Taiz vilayətində bir bazara endirilən zərbə nəticəsində Səna hökumətinin Səhiyyə Nazirliyinin məlumatına görə 7 nəfər həlak olmuş, 40 nəfər yaralanmışdı.

Yəmən Silahlı Qüvvələrinin sözçüsü Yəhya Səri noyabrın 1-də Səudiyyə aviasiyasının 24 saat ərzində Yəmənə 75 hava və raket zərbəsi endirdiyini bildirmişdi. Hazırda Ləhc və Taiz vilayətlərində Yəmən Silahlı Qüvvələri ilə Səudiyyə koalisiyasına bağlı qüvvələr arasında döyüşlər gedir.