Paşinyan: Yeni Konstitusiyadan sonra Azərbaycanla sülh sazişi imzalanacaqmı?

Ermənistan Azərbaycanla sülh sazişinin imzalanması üçün yeni Konstitusiyanın qəbulunun kifayət edib-etməyəcəyinə aydınlıq gətirmək istəyir. Bunu Ermənistanın Baş naziri Nikol Paşinyan parlamentdə dövlət büdcəsi layihəsinin müzakirəsi zamanı bildirib.

Paşinyan sual edib ki, yeni Konstitusiyanın qəbulundan sonra Azərbaycanla sülh sazişi imzalanacaqmı və bu, iki ölkə arasındakı bütün mübahisəli məsələlərin həlli demək olacaqmı? “Ermənistan yeni Konstitusiyanı qəbul edəndən sonra Azərbaycanla sülh sazişi imzalanacaqmı? Sazişin imzalanması Ermənistanla Azərbaycan arasında münaqişəli məsələlərin qalmadığı hərtərəfli sülhün bərqərar olması demək olacaqmı?” – deyə Paşinyan bildirib.

Baş nazirin sözlərinə görə, yaxın vaxtlarda Ermənistan hakimiyyətinin səyləri bu suallara cavab almağa yönələcək.

Bundan əvvəl Paşinyan yeni Konstitusiyanın qəbulu üçün parlamentdə müxalifətin dəstəyini almağa çalışacaqlarını bildirib. O, müxalifətin ictimai təzyiq nəticəsində konstitusiya referendumunu dəstəkləməyə məcbur qala biləcəyini də istisna etməyib. Parlamentdəki müxalif “Ermənistan” fraksiyasının rəhbəri Anna Qriqoryan isə hakimiyyətin təklif etdiyi konstitusiya dəyişikliklərinin əleyhinə səs verəcəklərini açıqlayıb.

Azərbaycan sülh sazişinin imzalanması üçün Ermənistan Konstitusiyasının dəyişdirilməsini şərt kimi irəli sürür. Rəsmi Bakının mövqeyinə görə, Ermənistan Konstitusiyasının preambulasında istinad edilən Müstəqillik Bəyannaməsində Azərbaycana qarşı ərazi iddiaları var. Ermənistan hakimiyyəti isə ölkə Konstitusiyasında belə iddiaların olduğunu qəbul etmir.

İyunun 7-də keçirilən parlament seçkilərində Paşinyanın rəhbərlik etdiyi “Vətəndaş Müqaviləsi” Partiyası səslərin 49,75 faizini qazanaraq 105 deputat yerindən 64-nü əldə edib və konstitusiya çoxluğu qazana bilməyib. Ermənistan qanunvericiliyinə əsasən, yeni Konstitusiya layihəsinin referenduma çıxarılması üçün ən azı 70 deputatın – parlament üzvlərinin üçdə ikisinin dəstəyi lazımdır. Bu isə hakim partiyanın ən azı daha 6 deputatın səsini almasını tələb edir.

Azərbaycan və Ermənistan arasında sülh sazişinin mətni 2025-ci il avqustun 8-də Vaşinqtonda paraflanıb, lakin sənəd hələ də imzalanmayıb.