Kiyevdə partlayışlar: Kliçko Rusiyanın infrastruktur obyektlərinə zərbələr endirdiyini bildirib
Noyabrın 7-nə keçən gecə Ukraynanın paytaxtında partlayışlar baş verib. Xarkovda isə pilotsuz uçuş aparatının yaşayış binasının damına dəyməsi barədə məlumat var.
Ukraynanın paytaxtı Kiyevdə noyabrın 7-nə keçən gecə, yerli vaxtla saat 01:00 radələrində partlayışlar baş verib. Kiyev meri Vitali Kliçko Rusiyanın şəhərdəki infrastruktur obyektlərinə zərbələr endirdiyini bildirib.
Bir neçə dəqiqə sonra paytaxtda təkrar partlayışlar eşidilib. Hücumun nəticələri barədə hələlik ətraflı məlumat verilməyib.
Təxminən eyni vaxtda Xarkov meri İqor Terexov şəhərin Kiyev rayonunda pilotsuz uçuş aparatının doqquzmərtəbəli yaşayış binasının damına dəyməsi barədə məlumat olduğunu bildirib.
Hücum Rusiya ilə Ukrayna arasında enerji infrastrukturuna qarşı qarşılıqlı zərbələrin davam etdiyi dövrə təsadüf edir. Rusiya Müdafiə Nazirliyi noyabrın 6-da gecə ərzində Ukraynanın enerji obyektlərinə və gəmilərə zərbələr endirildiyini bildirmişdi. Ukrayna Prezidenti Volodimir Zelenski isə həmin gün Rusiyanın neft emalı sektorunu hədəf alan əməliyyatların Ukraynanın enerji obyektlərinə edilən hücumlara cavab olaraq davam etdiyini açıqlamışdı.
Rusiya Prezidenti Vladimir Putin noyabrın 6-da Rusiya, Ukrayna və ABŞ arasında Əbu-Dabidə keçiriləcək üçtərəfli danışıqların noyabrın 10-da baş tutacağını təsdiqləyib.
