Gecə Odessaya hücum: 4 nəfər yaralanıb, Rusiya «Neptun» qurğularının vurulduğunu bildirib
Odessa Şəhər Hərbi Administrasiyasının rəhbəri Serhiy Lısak gecə Rusiyanın Odessaya hücumu nəticəsində dörd nəfərin yaralandığını bildirib. Rusiya Müdafiə Nazirliyi Odessa vilayətində «Neptun» komplekslərinin buraxılış qurğularının saxlandığı yerin vurulduğunu açıqlayıb.
Rusiya 2 noyabr gecəsi Ukraynanın Odessa şəhərinə hücum edib. Odessa Şəhər Hərbi Administrasiyasının rəhbəri Serhiy Lısak bildirib ki, hücum nəticəsində dörd nəfər yaralanıb.
Lısakın sözlərinə görə, infrastruktur obyektləri zərbə altında qalıb. Hücum iki yaşayış evinə və bir qaraja ziyan vurub, partlayış dalğası qonşu evlərin pəncərələrini qırıb. Hadisə yerindən yayılan görüntülərdə xilasedicilərin dağılmış tikililərin yanında işlədiyi görünür.
Rusiya Müdafiə Nazirliyi isə bildirib ki, Odessa vilayətində «Neptun» komplekslərinin buraxılış qurğularının gizləndiyi və saxlandığı yer vurulub. Nazirliyin məlumatına görə, Odessadan 58 kilometr cənubda dənizdə Ukrayna Silahlı Qüvvələri üçün nəzərdə tutulmuş yükləri daşıyan quru yük gəmisi də vurulub.
Rusiya Müdafiə Nazirliyi həmçinin bildirib ki, ötən gecə Rusiya regionları üzərində 212 Ukrayna pilotsuz uçuş aparatı ələ keçirilərək məhv edilib.
«Neptun» Ukraynada hazırlanmış gəmi əleyhinə qanadlı raket kompleksidir. Rusiya Müdafiə Nazirliyi noyabrın 1-də də Odessadan təxminən 16 kilometr cənub-şərqdə Ukrayna ordusu üçün yük daşıyan quru yük gəmisinin pilotsuz uçuş aparatı ilə vurulduğunu bildirmişdi.
