Səudiyyə Ərəbistanının cənubunda Xəmis Muşeyt, Əbha, Taif və Nəcranda partlayışlar baş verib
Səudiyyə Ərəbistanının cənubundakı dörd şəhərdə partlayışlar baş verib. Səudiyyə Mülki Müdafiəsi Xəmis Muşeytdə mümkün təhlükə barədə xəbərdarlıq edib.
Noyabrın 2-si səhər saatlarında Səudiyyə Ərəbistanının cənubundakı Xəmis Muşeyt, Əbha, Taif və Nəcran şəhərlərində partlayışlar baş verib.
İlk olaraq Xəmis Muşeyt şəhərində və Səudiyyə Ərəbistanının cənubunda partlayışlar qeydə alınıb. Bundan qısa müddət sonra Taif və Əbha şəhərlərində də partlayışlar baş verib. Yəmən tərəfindən Əbha və Taifə hücum edilib, Nəcran şəhəri isə Yəməndən raket hücumuna məruz qalıb.
Səudiyyə Ərəbistanının Mülki Müdafiəsi Xəmis Muşeyt şəhərində mümkün təhlükə barədə xəbərdarlıq yayıb.
Hücumlar nəticəsində dəyən ziyan və ya itkilər barədə hələlik rəsmi məlumat açıqlanmayıb.
Xəmis Muşeyt və Əbha Səudiyyə Ərəbistanının cənub-qərbindəki Əsir əyalətində, Nəcran isə Yəmən sərhədi yaxınlığında yerləşir. Taif şəhəri Məkkə əyalətinin ərazisindədir.
Hücumlar Səudiyyə Ərəbistanı ilə Yəmən arasında son günlərdə artan qarşıdurma fonunda baş verib. Noyabrın 1-də Yəmən Silahlı Qüvvələrinin sözçüsü Yəhya Səri Səudiyyə aviasiyasının 24 saat ərzində Yəmənə 75 hava və raket zərbəsi endirdiyini bildirmişdi. Noyabrın 2-nə keçən gecə Hudeydədə Ras İsa limanına və Bacildəki neft şirkətinə endirilən hava zərbələri nəticəsində 7 nəfər yaralanmışdı.
