Zelenski: Rusiya gecə Kiyev və vilayətinə 36 ballistik raketlə hücum edib, əsas hədəf enerji sistemi olub

Ukrayna Prezidenti Volodimir Zelenski bildirib ki, noyabrın 7-nə keçən gecə Rusiya Kiyev və Kiyev vilayətinə 36 ballistik raketlə hücum edib. Onun sözlərinə görə, zərbənin əsas hədəfi enerji sistemi olub.

Zelenskinin sözlərinə görə, Kiyev vilayətində Rusiya qoşunları Rivne və Xmelnitski atom elektrik stansiyalarını paytaxt və Ukraynanın mərkəzi regionları ilə birləşdirən yarımstansiyaları atəşə tutub. Vinnitsa, Jitomir, Rivne, Xarkov və Dnepropetrovsk vilayətlərində də yarımstansiyalar zədələnib. Kiyevdən başqa 12 vilayət hücuma məruz qalıb, doqquz nəfər, o cümlədən bir uşaq xəsarət alıb.

Ukrayna Hərbi Hava Qüvvələri bildirib ki, gecə Rusiya qoşunları Ukraynaya "İskəndər-M", "Sirkon", KN-23 və S-400 raketləri, eləcə də 172 zərbə dronu buraxıb. Hava hücumundan müdafiə dörd raketi və 149 pilotsuz uçuş aparatını zərərsizləşdirib. Raket və dron zərbələri 24 məntəqədə qeydə alınıb, on yerdə qəlpələr düşüb.

Zelenski Rusiyanın Ukraynanı qaranlığa qərq etməyə çalışdığını bildirib və ABŞ-dan dəstəyin artırılmasını istəyib.

Gecə Kiyev meri Vitali Kliçko Rusiyanın infrastruktur obyektlərinə zərbələr endirdiyini bildirmişdi. Kiyev Şəhər Hərbi Administrasiyası Solomyanski rayonunda uşaq bağçasının binasının zədələndiyini, qeyri-yaşayış binasında yanğın baş verdiyini açıqlamışdı. Ukrayna tərəfinin məlumatına görə, hücum nəticəsində Çerniqov tamamilə elektriksiz qalıb, Çerniqov vilayətində və Slavutiçdə təxminən 150 min abonent işıqsız qalıb.

Rusiya Müdafiə Nazirliyi isə bildirib ki, gecə Kiyevdə Şimal avtomobil körpüsü, "Flaminqo" raketləri istehsal edən "Meridian" müəssisəsi və Kiyev vilayətində Tripilska istilik elektrik stansiyası vurulub.

Hücum Rusiya Prezidenti Vladimir Putinin Rusiya, Ukrayna və ABŞ arasında danışıqların noyabrın 10-da Əbu-Dabidə keçiriləcəyini təsdiqləməsindən sonra baş verib. Rivne və Xmelnitski atom elektrik stansiyaları Ukraynanın qərbində yerləşən və fəaliyyətdə olan AES-lərdir.