Bəni Həşişə Səudiyyə zərbələri: şəhidlərin sayı 32-yə, yaralıların sayı 38-ə çatıb

Səna hökumətinin səhiyyə naziri Əli Şeyban şənbə axşamı bildirib ki, Səudiyyə aviasiyasının Yəmən paytaxtı Sənanın şərqindəki Bəni Həşiş rayonunda endirdiyi zərbələr nəticəsində 32 nəfər şəhid olub, 38 nəfər yaralanıb.

Nazirin sözlərinə görə, bu, yekun olmayan rəqəmdir. Şeyban daha sonra verdiyi açıqlamada Bəni Həşiş rayonunun Əş-Şəriyyə kəndində Səudiyyə aviasiyasının törətdiyi qətliam nəticəsində ümumilikdə 70 mülki şəxsin şəhid olduğunu və yaralandığını vurğulayıb.

Zərbələrlə bağlı ilk məlumat şənbə səhər verilmişdi: o zaman 10 nəfərin şəhid olduğu, hava zərbələrinin 5 evi dağıtdığı və şəhidlərin dağıntılar altından çıxarılmasının davam etdiyi bildirilmişdi. Günorta saatlarında Yəmən Səhiyyə Nazirliyi şəhidlərin sayının 25-ə, yaralıların sayının 30-a çatdığını açıqlamışdı.

Yəmənin Ümumi Xalq Konqresi partiyası Səudiyyə aviasiyasının Bəni Həşiş rayonunda vətəndaşların evlərini hədəf almasını pisləyib. Partiyanın bəyanatında deyilir: “Əhalinin yaşadığı evlərin hədəf alınması bütün tərkib hissələri olan müharibə cinayətidir”.

Yəmən Alimlər Birliyi də açıqlama yayaraq Səudiyyənin Yəmən xalqına qarşı törətdiyi qətliamlar qarşısında ərəb və İslam dünyasının susqunluğunu pisləyib.

Bundan əvvəl Yəmən Silahlı Qüvvələrinin sözçüsü, briqada generalı Yəhya Səri Səudiyyə hərbi aviasiyasının son 24 saat ərzində paytaxt Səna, eləcə də Cauf, Taiz, Amran, Həcca, Səadə, Məarib və Ləhc vilayətlərində mülki obyektləri hədəf alaraq 105 hava və raket zərbəsi endirdiyini bildirmişdi. Onun sözlərinə görə, eskalasiyanın başlanğıcından bəri Səudiyyənin Yəmənə endirdiyi hava və raket zərbələrinin ümumi sayı 4369-a çatıb.

Bəni Həşiş Səna vilayətinə daxil olan, paytaxt Sənanın şərqində yerləşən rayondur. Eyni gün Yəmən Silahlı Qüvvələri Səudiyyə Ərəbistanının ərazisində, o cümlədən Nəcran və Cizan istiqamətlərində raket və PUA hücumları həyata keçirdiyini açıqlamışdı.