Ərdoğan Trampla telefonla danışıb: İran–ABŞ gərginliyi diplomatiya yolu ilə həll olunmalıdır

Türkiyə Prezidenti Rəcəb Tayyib Ərdoğan 7 noyabrda ABŞ Prezidenti Donald Trampla telefonla danışıb. Türkiyə Prezidentliyinin Kommunikasiya İdarəsinin açıqlamasına görə, söhbət zamanı Türkiyə–ABŞ ikitərəfli münasibətləri, eləcə də regional və qlobal hadisələr müzakirə olunub.

Ərdoğan İran ilə ABŞ arasındakı gərginliyin sona çatmalı və problemlərin diplomatiya yolu ilə həll olunmalı olduğunu bildirib, Türkiyənin sülh üçün səylərini davam etdirəcəyini vurğulayıb.

Türkiyə Prezidenti Türkiyə ilə ABŞ arasında əməkdaşlığın artaraq davam edəcəyinə inandığını qeyd edib və qarşıdakı dövrdə də ikitərəfli münasibətlərə təkan vermək üçün çalışacaqlarını deyib.

Ərdoğan həmçinin Ukrayna–Rusiya müharibəsinin sona çatdırılması üçün artan diplomatik səylərin müsbət nəticə verəcəyinə ümid etdiyini bildirib. O, Türkiyənin bu istiqamətdəki işlərə töhfə verməyə davam edəcəyini və həm Ukrayna, həm də Rusiya ilə təmasların artırılmasının vacib olduğunu vurğulayıb.

Söhbət zamanı Ərdoğan Türk Dövlətləri Təşkilatının Zirvəsinə verdiyi dəstəyə görə Trampa təşəkkür edib.

Telefon danışığı İran ilə ABŞ arasında gərginliyin davam etdiyi və Qətərin iki ölkə arasında vasitəçilik səylərini sürdürdüyünü bildirdiyi bir vaxtda baş tutub.

Türkiyə Prezidentliyinin Kommunikasiya İdarəsinin rəhbəri Burhanəddin Duranın açıqlamasına görə, Ərdoğan İlham Əliyevin dəvəti ilə 8 noyabr 2026-cı ildə Azərbaycanın Zəfər Günü münasibətilə Qarabağa səfər edəcək. Səfər zamanı iki liderin Türkiyə–Azərbaycan əməkdaşlığını, regional və qlobal hadisələri müzakirə edəcəyi bildirilib.