Kiyevdə partlayışlardan sonra kritik infrastruktur obyektinə zərbə dəyib, şəhərin bir hissəsində işıq sönüb

Oktyabrın 30-u axşam Ukraynanın paytaxtı Kiyevdə partlayışlar baş verib, bunun ardınca şəhərin bəzi rayonlarında elektrik enerjisi kəsilib. Kiyev meri Vitali Kliçko kritik infrastruktur obyektinə zərbə dəydiyini bildirib.

Kiyevdə Kiyev vaxtı ilə saat 21:42-də dron təhlükəsi səbəbindən hava həyəcanı elan edilib, saat 21:51-də həyəcan siqnalı ləğv olunub. Bundan sonra şəhərin bir hissəsində partlayışlardan sonra işığın söndüyü bildirilib. Kliçko kritik infrastruktur obyektinə zərbə dəydiyini açıqlayıb və təcili xidmətlərin hadisə yerinə yollandığını bildirib.

Saat 22:21-də paytaxtda dron təhlükəsi səbəbindən yenidən hava həyəcanı elan edilib, saat 22:35-də isə həyəcan siqnalı ləğv olunub. Zərbənin dəydiyi obyektin növü, dəymiş ziyan və xəsarət alanların olub-olmaması barədə rəsmi məlumat hələlik açıqlanmayıb.

Elə həmin gün Ukraynanın Dnepr şəhərində dəmiryol vağzalı və sərnişin qatarı ardıcıl ikinci dəfə zərbəyə məruz qalıb. Rusiyanın baş nazirinin müavini Aleksandr Novak isə oktyabrın 30-da Ukrayna PUA-larının Rusiyanın üç neft emalı zavoduna və bir qaz-kimya kompleksinə hücum etdiyini bildirib.

Rusiya 2022-ci ilin oktyabrından etibarən Ukraynanın enerji və digər kritik infrastruktur obyektlərinə dəfələrlə raket və dron zərbələri endirib; bu zərbələr Kiyev də daxil olmaqla bir çox şəhərdə elektrik və su təchizatında fasilələrə səbəb olub.