Bəni Həşişdə Səudiyyə zərbələri: şəhidlərin sayı 25-ə, yaralıların sayı 30-a çatıb

Yəmən Səhiyyə Nazirliyi şənbə günü Səudiyyə aviasiyasının paytaxt Sənanın şərqindəki Bəni Həşiş rayonunun Əş-Şəriyyə kəndində vətəndaşların evlərinə endirdiyi zərbələr nəticəsində 25 nəfərin şəhid olduğunu, 30 nəfərin yaralandığını bildirib.

Nazirliyin açıqlamasına görə, bu rəqəmlər yekun deyil. Səhiyyə Nazirliyi zərbələri Səudiyyənin vətəndaşların evlərinə qarşı törətdiyi cinayət kimi qiymətləndirib.

Şənbə səhəri Yəmən tərəfi ilkin olaraq hava zərbələri nəticəsində 10 nəfərin şəhid olduğunu, 5 evin dağıldığını və şəhidlərin dağıntılar altından çıxarılmasının davam etdiyini açıqlamışdı. Günün ikinci yarısında şəhidlərin sayı 25-ə yüksəlib.

Ənsarullahın Siyasi Bürosu bəyanatında Bəni Həşiş rayonunun Əş-Şəriyyə kəndində törədilən cinayətin Səudiyyə rejiminin Yəmən xalqına qarşı törətdiyi cinayətlər siyahısına əlavə olunduğunu bildirib.

Yəmənin Ali Siyasi Şurasının sədri Mehdi əl-Məşşat da açıqlama yayaraq deyib: "Xalqımızın bütün şəhidlərinə söz veririk ki, qatilləri cinayətlərinə görə cəzalandıracağıq".

Zərbələr Səudiyyə ilə Yəmən arasında son günlərdə kəskinləşən hərbi qarşıdurma fonunda baş verib. Noyabrın 6-da Taiz şəhərində xalq bazarına endirilən zərbə nəticəsində 30 mülki şəxsin şəhid olduğu, 8 nəfərin yaralandığı bildirilmişdi. Yəmən Silahlı Qüvvələrinin sözçüsü Yəhya Səri isə Səudiyyə aviasiyasının son 24 saatda Yəmənə 67 hava və raket zərbəsi endirdiyini açıqlamışdı.

Şənbə günü Yəmən Silahlı Qüvvələri Səudiyyə Ərəbistanının Nəcran şəhərini raketlərlə hədəf alıb, hücumdan sonra Nəcranda və ölkənin cənubunda partlayışlar eşidilib. Bəni Həşiş Sənanın şərqində yerləşən və paytaxt vilayətinə daxil olan rayondur.