Rusiya Müdafiə Nazirliyi: Qara dənizdə Ukraynaya hərbi əmlak daşıyan quru yük gəmisi vurulub

Rusiya Müdafiə Nazirliyi noyabrın 7-də bildirib ki, Qara dənizin akvatoriyasında, Odessanın cənub-şərqində Ukraynaya hərbi əmlak çatdıran quru yük gəmisi vurulub.

Nazirliyin açıqlamasında gəminin adı, bayrağı, ekipajı və zərbənin nəticələri barədə əlavə məlumat verilməyib.

Rusiya Müdafiə Nazirliyi həmin gecə Kiyevdə Ukrayna ordusu üçün silah daşınmasında istifadə olunan Şimal avtomobil körpüsünün, "Flaminqo" raketləri istehsal edən "Meridian" müəssisəsinin, Kiyev vilayətində Tripilska istilik elektrik stansiyasının və "Kiyevskaya" elektrik yarımstansiyasının, həmçinin Kiyev vilayətində raket yanacağı komponentləri istehsal edən müəssisənin vurulduğunu da açıqlayıb.

Ukrayna Hərbi Hava Qüvvələri bildirib ki, gecə Rusiya qoşunları Ukraynaya "İskəndər-M", "Sirkon", KN-23 və S-400 raketləri, həmçinin 172 zərbə dronu buraxıb. Hava hücumundan müdafiə dörd raketi və 149 pilotsuz uçuş aparatını zərərsizləşdirib, raket və dronların 24 məkana dəydiyi, on yerdə isə qəlpələrin düşdüyü qeydə alınıb.

Odessa Ukraynanın Qara dəniz sahilindəki ən böyük liman şəhəridir. Rusiya bundan əvvəl də Odessa limanları yaxınlığında Ukraynaya hərbi yük daşıyan gəmiləri vurduğunu dəfələrlə bildirib.