CENTCOM İranın quru sərhədləri və Xəzər dənizi üzərindən silah daşımasının qarşısını almaq üçün “Dəmir Qapı” qrupu yaradıb

ABŞ Mərkəzi Komandanlığı (CENTCOM) 7 noyabrda komandanlığın rəhbəri admiral Bred Kuperin İranın qabaqcıl silahlar və digər materialları daşımaq üçün quru yollardan istifadə etməsinin qarşısını almağa yönəlmiş ABŞ hökumətinin səylərini dəstəkləyəcək işçi qrupunun yaradılması barədə göstəriş verdiyini açıqlayıb.

Açıqlamaya görə, “Dəmir Qapı” (Task Force Iron Gate) adlanan işçi qrupu Florida ştatının Tampa şəhərində yerləşən, təxminən 20 mülki və hərbi əməkdaşdan ibarət daxili heyətdir.

CENTCOM bildirib ki, yeni qrup İranın quru sərhədləri və Xəzər dənizi vasitəsilə qabaqcıl silah sistemlərinin, ikili təyinatlı texnologiyaların, sanksiyaya məruz qalmış materialların və qeyri-qanuni gəlir axınlarının hərəkətinin qarşısını almaq üçün ABŞ hökumətinin digər qurumları ilə koordinasiya aparacaq.

Komandanlığın rəhbəri qrupun yaradılmasının İrana qarşı dəniz blokadasını gücləndirəcəyini bildirib. CENTCOM-un açıqlamasına görə, dəniz blokadası bərpa olunduğu vaxtdan bəri İranın dəyəri 25 milyard dollardan çox olan neft ixrac etməsinin qarşısını alıb.

Elə həmin gün İraqın xarici işlər naziri Vaşinqtonun Bağdaddan İranla sərhəd-keçid məntəqələrini bağlamağı tələb etdiyini açıqlamışdı. ABŞ bu ilin aprelində İran limanlarına qarşı dəniz blokadası elan etmişdi.

Xəzər dənizi Azərbaycan, Rusiya, Qazaxıstan, Türkmənistan və İranın sahilləri ilə əhatələnən dünyanın ən böyük qapalı su hövzəsidir. İranın şimal sahilləri bu dənizə çıxış verir.