Səna: Son 24 saatda Səudiyyə təcavüzü nəticəsində 76 mülki şəxs şəhid olub və yaralanıb

Yəmənin Səna hökumətinin Səhiyyə Nazirliyi son 24 saat ərzində Səudiyyə təcavüzü və onun muzdlularının hücumları nəticəsində 76 mülki şəxsin şəhid olduğunu və yaralandığını bildirib.

Səna tərəfi həmçinin Səudiyyə təcavüz aviasiyasının Taiz şəhərinin qərb kənarındakı Məfrəq Şərəb bölgəsində plastik fabrikini hədəfə aldığını açıqlayıb.

Noyabrın 2-də Taiz vilayətinin cənubundakı Məsrax rayonunun Əl-Məxaf bölgəsində bazar hədəfə alınıb, şəhidlər və yaralılar olub. Səna tərəfi bazarın Səudiyyə Ərəbistanı tərəfindən vurulduğunu bildirib, tərəflər hadisəyə görə bir-birini günahlandırıb.

Həmin gün Yəmənin Ədən hökumətinin Səhiyyə Nazirliyi Ləhc vilayətindəki Əs-Səqiyə səhiyyə mərkəzinin Ənsarullah tərəfindən atəşə tutulması nəticəsində 5 nəfərin öldüyünü bildirib.

Yəmənin Səna hökumətinin Xarici İşlər Nazirliyi noyabrın 2-də BMT, Avropa İttifaqı və Afrika İttifaqına Səudiyyə Ərəbistanının davam edən təcavüzü ilə bağlı memorandumlar göndərib. Səna tərəfinin açıqladığı rəqəmlərə görə, 13 iyuldan bəri Səudiyyə Yəmənə 3830-dan çox hava və raket zərbəsi endirib, şəhid və yaralıların sayı 768 nəfərdir.

Noyabrın 1-də Yəmən Silahlı Qüvvələrinin sözçüsü Yəhya Səri Səudiyyə aviasiyasının 24 saat ərzində səkkiz vilayətdə mülki obyektlərə 75 hava və raket zərbəsi endirdiyini bildirmişdi.