Rusiya qüvvələri Dneprdə dəmiryol vağzalını və sərnişin qatarını yenidən vurub
Ukraynanın Dnepr şəhərindəki dəmiryol vağzalı oktyabrın 30-da axşam saatlarında ardıcıl olaraq yenidən zərbəyə məruz qalıb, zərbələrdən biri sərnişin qatarına dəyib.
Rusiya qüvvələri oktyabrın 30-da Ukraynanın Dnepr (Dnepropetrovsk) şəhərində dəmiryol vağzalını və sərnişin qatarını yenidən vurub.
Bundan təxminən bir saat əvvəl şəhərdəki dəmiryol vağzalının ardıcıl ikinci dəfə vurulduğu bildirilmişdi. Zərbələr nəticəsində itkilər və dağıntıların miqyası barədə hələlik məlumat açıqlanmayıb.
Dnepr Dnepropetrovsk vilayətinin inzibati mərkəzi, Ukraynanın ən böyük şəhərlərindən biri və ölkənin mühüm dəmiryol qovşaqlarındandır. Rusiya qüvvələri 2026-cı il ərzində Dnepropetrovsk vilayətində sərnişin qatarlarına bir neçə dəfə zərbə endirib: iyulun 24-də vilayətdə sərnişin qatarı vurulub, sentyabrın 8-də isə Dnepr–Zaporojye qatarı hədəfə alınıb.
Oktyabrın 30-da səhər saatlarında Rusiya Kiyevdə enerji və hərbi-sənaye obyektlərinə zərbələr endirmişdi. Həmin gün Rusiya Prezidentinin köməkçisi Yuri Uşakov Rusiya, ABŞ və Ukraynanın üçtərəfli danışıqların bərpası barədə razılığa gəldiyini bildirib, Kremlin sözçüsü Dmitri Peskov isə danışıqlara hazırlığın döyüş əməliyyatlarının dayandırılması öhdəliyini nəzərdə tutmadığını açıqlayıb.
